Liburuen maileguak maiatzaren 2tik aurrera (eguena) liburutegietara telefonoz deituz edota e-mail bat bidaliz egin ahal izango dira, eta maiatzaren 7tik aurrera postontzian jaso. Azken data horretatik aurrera, martitzenero eramango dituzte postontzira eskatutako liburuak, eta erabiltzaileek bost eguneko epea izango dute horiek jasotzeko. Epe hori igarota, jaso gabeko aleak jatorrizko liburutegietara itzuliko dituzte.
Armairua erabiltzeko prozedura oso erraza da: gailuaren menu-pantailan eskaera baten bilketa edota itzulketa bat egingo den aukeratu beharko da; jarraian, liburutegien txartela eskaneatu, bazkide zenbakia sartu edo NAN zenbakia (letra barik) jarri eta liburuaren titulua pantailan aukeratuko da; ondoren, liburua jaso gura bada, ate bat automatikoki zabalduko da titulua atera ahal izateko. Alea itzultzeko, berriz, aldez aurretik liburua eskaneatu beharko da eta, ondoren, zabalduko den armairuan sartu.
Ordutegia
Liburukutxa Andra Mari zerbitzua astelehenetik domekara erabili ahal izango da, kiroldegiko ordutegian. Neguan (irailaren 16tik ekainaren 15era), 8:30etik 21:30era; eta udan (ekainaren 16tik irailaren 15era bitartean), 8:15etik 13:45era eta 17:30etik 21:30era. Bestalde, postontzian jaso beharreko liburuen mailegua eskatzeko udaleko hiru liburutegietan egin daiteke, ohiko ordutegietan.
Gailuaren funtzionamendua ezagutu gura dutenek, in situ egin ahal izango dute, datorren asteko astelehenean, maiatzak 6, eskainiko duten prestakuntzaren bidez. Liburutegiek laster emango dute horren berri euren zentroetan eta sare sozialen bidez.