Algortako Bidebarri kalean, txokolate eta gaileta usain gozoa dario Alfajores Brutales proiektuko kideek duten lantegiari. Atea parez pare zabaldu digute bertoko ugazaba Baltazar Leiro Bechir eta Noel Rubianes argentinarrek, eta, barrura sartu bezain laster, hamaika koloredun gailetak topatu ditugu aurrez aurre, aukeran dituzten askotariko zaporeez betetzeko zain. Diotenez, hilero 5.000 alfajor egiten dituzte han, eskuz, milaka saiakera egin ostean egokitutako errezetei jarraituta; horren testigu dira sukaldeko hormak, laborategi bat balitz bezala, denborez eta jarraipenez betetako errezetez margotuta baitaude.