Behin ikastolako batailatxoak gogoratuta, segituan bota zidan politikan aktibo ikusten ninduela, eta asko pozten zela ni EAJn pentsatzen dudana adierazten ikusteaz, ez dela erreza, gaur egun, politikan murgiltzea eta are gutxiago gaztea izanda… Ez nuen komentarioa etortzen ikusi eta, benetan, asko eskertu nion; batez ere, laguna ezker abertzale inguruan mugitu denean betidanik. Danetarik entzun behar izan dut alderdi bati aurpegia ipini, iritzia adierazi eta sinisten dudanean lan egiteagatik: kriteriorik ez dudala, diruagatik nagoela…
Aurten Europako gazteriarena da, EBko politika guztietan gazteria txertapena sustatzeko urtea da, eta nik, ikastolako lagunak nirekin egin bezala, zutabea probestu nahi dut politikan era eraikitzailean murgildutako gazte guztiak zoriontzeko: EAJn, EH Bildun, PPn, PSOEn, Podemosen… Norbaitek imaginatzen du etorkizuneko gizartea gaurko gaztedia politikan murgilduta egon gabe?